Katibu Mkuu Ofisi ya Makamu wa Rais Mhandis Cyprian Luhemeja ameshiriki mjadala kuhusu ‘Kutumia sayansi pamoja na maarifa ya asili kwa ajili ya kuongeza ustahimilivu dhidi ya mabadiliko ya tabianchi na kuimarisha uhifadhi wa mazingira’.

Mjadala huo umefanyika pembezoni mwa Mkutano wa Saba wa Baraza la Mazingira la Umoja wa Mataifa (UNEA 7) unaoendelea jijini Nairobi, Kenya Desemba 10, 2025.

Katika mchango wake, Mhandisi Luhemeja aliwasilisha uzoefu wa Tanzania katika kufanikisha uhifadhi wa miamba ya matumbawe kupitia mbinu shirikishi.

Akiendelea kuchangia alieleza kuwa jamii hususan jamii za wenyeji wa pwani wamekuwa wakishirikishwa kikamilifu katika shughuli za ulinzi na uhifadhi wa matumbawe.

Akifafanua Zaidi, Mhandisi Luhemeja alifafanua kuwa mbinu ya kuishirikisha jamii imefanikisha wananchi kupata manufaa ya haki na yanayoonekana kupitia fursa za kipato zinazostahimili mbadiliko ya tabianchi.

Aidha, washiriki wa mjadala walikuwa ni pamoja na mawaziri wa mazingira, viongozi wa jamii za asili, watafiti, wataalamu wa mazingira na wawakilishi wa mashirika ya kimataifa yanayojihusisha na hifahi ya mazingira kutoka Afrika, Amerika ya Kusini na maeneo mengine.

Lengo likiwa ni kubadilishana uzoefu, kushauriana na kuweka mikakati ya pamoja ya kujenga ustahimilivu dhidi ya athari za mabadiliko ya tabianchi katika ikolojia ya miamba ya matumbawe.

Mkutano huo unawashirikisha wakuu wa nchi na serikali, mawaziri wanaoshughulikia Mazingira, wataalam na wadau wa Mazingira na maendeleo endelevu kutoka nchi 193 wanachama wa Umoja wa Mataifa, Mashirika ya Umoja wa Mataifa na asasi za kiraia.

Mada kuu katika mkutano huo ni "Kukuza Suluhu endelevu kwa ajili ya sayari yenye ustahimilivu".

Aidha, Mkutano huu utajadili na kupitisha maazimio na maamuzi mbalimbali yanayohusu mabadiliko ya tabianchi, hifadhi ya bioanuai na udhibiti wa uchafuzi wa Mazingira duniani.

Mkutano huo wa siku tano unatarajiwa kuhitimishwa Desemba 12, 2025